श्री हनुमान चालीसा

।। दोहा ।। 

श्री गुरु चरन सरोज रज, निज मन मुकुरू सुधारि ।

बरनौ रघुबर बिमल जसु, जो दायक फल चारि ।।

बुद्धिहीन तनु जानिके , सुमिरौ पवन कुमार ।

बल बुद्धि विद्या देहु मोहि, हरहु कलेश विकार ।।

 

।। चौपाई ।।

जय हनुमान ज्ञान गुन सागर ।

जय कपीस तिहु लोक उजागर ।।

रामदूत अतुलित बल धामा ।

अंजनि पुत्र पवन सुत नामा ।।

महावीर विक्रम बजरंगी ।

कुमति निवार सुमति के संगी ।।

कंचन बरन बिराज सुवेसा ।

कानन कुण्डल कुंचित केसा ।।

हाथ बज्र और ध्वजा बिराजै ।

कांधे मूंज जनेऊ साजै ।। 

शंकर सुवन केसरी नन्दन ।

तेज प्रताप महा जग बन्दन ।।

विद्यावान गुनी अति चातुर ।

राम काज करिबे को आतुर ।।

प्रभु चरित्र सुनिबे को रसिया ।

राम लखन सीता मन बसिया ।।

सूक्ष्म रूप धरि सियहिं दिखावा ।
विकट रूप धरि लंक जरावा ।।
भीम रूप धरि असुर संहारे ।
रामचंद्र जी के काज संवारे ।।
लाय संजीवन लखन जियाये ।
श्री रघुबीर हरषि उर लाये ।।
रघुपती किन्हीं बहुत बडाई ।
तुम मम प्रिय भरतहि सम भाई ।।
सहस बदन तुम्हरो यस गावै ।
अस कहि श्रीपति कंठ लगावै ।।
सनकादिक ब्रह्मादि मुनिसा ।
नारद सारद सहित अहीसा ।।
 जम कुबेर दिकपाल जहां ते ।
कवि कोविद कहि  सके कहां ते ।।
 तुम उपकार सुग्रीवहिं कीन्हा ।
 राम मिलाय राज पद दीन्हा ।।
 तुम्हरो मन्त्र विभीषण माना ।
लंकेश्वर भये सब जग जाना ।।

जुग सहस्त्र योजन पार भानू ।

लील्यो ताहि मधुर फल जानू ।।

प्रभू मुद्रिका मेलि मुख माहीं ।

जलधि लांघि गये अचरज नाहीं ।।

दुर्गम काज जगत के जेते ।

सुगमानुग्रह तुम्हरे तेते ।।

राम दुआरे तुम रखवारे ।

होत न आज्ञा बिनु पैसारे ।।

सब सुख लहै तुम्हारी सरना ।

तुम रक्षक काहु को डरना ।।

आपन तेज सम्हारो आपै ।

तीनहु लोक हांक ते कांपै ।।

भूत पिशाच निकट नहिं आवै ।

महावीर जब नाम सुनावै ।।

नासे रोग  हरे सब पीरा ।

 जपत निरंतर हनुमत वीरा ।।

संकट ते हनुमान  छुडावै ।
मन क्रम बचन ध्यान जो लावै ।।
सब पार राम तपस्वी राजा ।

तिनके काज सकल तुम साजा ।।

और मनोरथ जो कोई लावै ।
सोई अमित जीवन फल पावै ।।
चारों जुग परताप तुम्हारा ।
है परसिद्ध जगत उजियारा ।।
साधु संत के तुम रखवारे ।
असुर निकंदन राम दुलारे ।।
अष्ट सिद्धि नव निधि के दाता ।
अस वर दीन जानकी माता ।।
राम रसायन तुम्हरे पासा ।
सदा रहो रघुपति के दासा ।।
तुम्हरे भजन राम को पावै ।
जनम जनम के दुख बिसरावै ।।
अन्तकाल रघुबर पुर जाई ।
जहां जन्म हरि भक्त कहाई ।।
और देवता चित्त न धरई ।
हनुमत सेई सर्व सुख करई ।।
संकट कटे मिटे सब पीरा ।
जो सुमिरे हनुमत बलबीरा ।।
जय जय जय हनुमान गोसाई ।
 कृपा करहु गुरु देव की नाई ।।
जो शत बार पाठ कर कोई ।
छूटहिं बंदि महा सुख होई ।।
जो यह पढे हनुमान चालीसा ।
होय सिद्धि साखी गौरीसा ।।
तुलसीदास सदा हरि चेरा ।
कीजै नाथ हृदय मंह डेरा ।।


।। दोहा ।।

पवन तनय संकट हरन, मंगल मूरति रूप ।

राम लखन सीता सहित, हृदय बसहु सुर भूप ।।

पवन सुत हनुमान की जय ।  सियाबर रामचंद्र की जय ।

लाडले लखन लाल की जय । सब संतन की जय ।

जय जय जय जय जय  

Download: Page-1 | Page-2

Right click and choose"Save Target/Link as"